From left, Jacqueline Paul, Maia Ratana, Pania Newton, and Hanna-Marie Monga. Photo: Tuputau Lelaulu
Kō atu I te rima tekau ōrau o te hunga e noho kāinga kore ana ki Aotearoa nei kei raro iho i ngā tau 25.
E ai ki te rangahau kātahi ano kia whakarewahia I te pūrongo Youth Homelessness in Tāmaki Makaurau, Aotearoa New Zealand ki te pā te hunga rangatahi ki te raru kāinga kore, he kūrakuraku te haere mōna ki te whai tautoko, he koretake rawa atu hoki ngā rauemi kua whakatahangia mā rātou.
Hei kaupare ake I aua āhuatanga he kāhui kairangahau wāhine kua whakatoopungia te manapori, te mōhiotanga me te aroha kia whai mana ai te hunga rangatahi ki ngā mahere whakawhanake whare, whai kāinga hoki a te kāwanatanga.
Ko “Rangatahi ki te Kāinga” te ingoa o te tira I whakatinanahia e Ngā Wai A Te Tūī mā te pūtea tautoko a He Kāinga Whakamana Tangata, Whakamana Taiao (BBHTC). Koinei tētahi o ngā peka rangahau a UIKI (Urban Intergenerational Kāinga Innovations).
He kaupapa tēnei kei te kōkirihia e Ahorangi Jenny Lee-Morgan (Waikato-Tainui), hei taana ko te nui o te utu me te kino o te whakatoihara ā ture, ā tangata nei ētahi o ngā āhuatanga kei te kaha peehi I te hunga rangatahi Māori. Hei taana anō kei taua reanga kē te rongoā, ko te raru ko ngā taringa kōhatu me te tōmuri rawa o te hāere a nga mana nui.
He rangatahi te katoa o ngā kairangahau o te kaupapa nei, heoi kua eke kē rātou katoa ki ngā taumata ikeike o ngā mahi kaihoahoa, mākohakoha hoki. Ko ngā mema ko Maia Ratana (Te Arawa, Ngā Rauru kii Tahi, Ngāti Raukawa), Jacqueline Paul (Ngā Puhi, Ngāti Kahungunu ki Heretaunga, Ngāti Tūwharetoa), Pania Newton (Ngāpuhi, Waikato, Te Rarawa), Hanna-Marie Monga (Ngāti Whatua, Te Uri o Hau and Cook Islands), rātou ko Grace Walker (Ngāti Kahungunu, Ngāruahine).
Ki tā Maia Ratana, mā te kohikohi kōrero, mā te tuari whakaaro, mā te whai mātauranga me te noho ngātahi ki te taha o ngā ringa raupā kua roa nei e manaaki ana I te hunga rangatahi me te kore rauemi ka whakakaha ake te mana me te reo o taua reanga.
Ki tā Jacqueline Paul me tuku I te mana whakarite ture, tikanga whakahaere ki te hunga rangatahi kei tua ake nei. Hei taana ko rātou ngā rangatahi o apōpō, ki te mahue iho tonu rātou ki waho atu I ngā mahi whakatika raru whai whare, he pouri rawa te tirohanga, he kino hoki te ao kei te heke mai.
Ko ngā mema katoa o tenei tira kua whakaritea ketia he huarahi auaha mā ratou ake kia whai kāinga haumaru, kia whai kainga mo ake tonu atu a rātou ake whānau.
Kua kapohia ngā kōrero katoa ki roto I tētahi hōtaka ā tihi nei ka whakapāhohia hei te tau e tu mai nei, ko te ingoa “He Whare Mo Wai?” ka āta tiro atu rātou ki ngā kaupapa papakāinga, ngā kaupapa whakahoahoa kāinga, whakahoahoa hapori hoki me nga taumahatanga o te mahi hoko whare.
Whakapiri mai ki ta matou pae tukutuku mo ngā whakamarama.
Read the research
More information
For all media enquiries, please contact Taiha Molyneux.
Share – Tuari
Date posted: 10 Whiringa-ā-rangi 2022